December 23, 2025

مسجدِ نبوی ﷺ کے معروف مؤذن شیخ فیصل بن عبد المالک نعمان کا مدینہ منورہ میں انتقال ہو گیا۔ ان کی نمازِ جنازہ فجر کے بعد ادا کی گئی اور جنت البقیع میں تدفین عمل میں آئی۔

مدینہ منورہ: مسجدِ نبوی ﷺ کے معروف مؤذن شیخ فیصل بن عبد الملک نعمان پیر، 22 دسمبر کو مدینہ منورہ میں انتقال کر گئے۔ ان کے انتقال کی خبر سے عالمِ اسلام میں رنج و غم کی لہر دوڑ گئی۔

سعودی عرب کی معروف ویب سائٹ Inside the Haramain کے مطابق، مرحوم کی نمازِ جنازہ منگل کے روز فجر کی نماز کے بعد مسجدِ نبوی ﷺ کے احاطے میں ادا کی گئی، جس کے بعد انہیں جنت البقیع کے تاریخی قبرستان میں سپردِ خاک کر دیا گیا۔

شیخ فیصل نعمان نے 2001 سے 2025 تک تقریباً 25 برس مسجدِ نبوی ﷺ میں مؤذن کے فرائض انجام دیے۔ ان کی پُرسوز اور دل کو چھو لینے والی اذان نے دنیا بھر کے لاکھوں مسلمانوں کے دلوں میں ایک خاص مقام بنا لیا تھا

وہ ایک ایسے خاندان سے تعلق رکھتے تھے جسے مسجدِ نبوی ﷺ میں اذان دینے کی طویل روایت حاصل رہی ہے۔ ان کے والد کو کم عمری، یعنی 14 برس کی عمر میں مؤذن مقرر کیا گیا تھا، جبکہ ان کے دادا بھی اسی مقدس منصب پر فائز رہ چکے تھے۔

شیخ فیصل نعمان کی دینی خدمات، عاجزی اور مسلسل عبادت نے انہیں اہلِ ایمان کے دلوں میں ہمیشہ کے لیے زندہ کر دیا ہے۔ ان کے انتقال پر دنیا بھر سے علما، ائمہ اور مسلمانوں نے گہرے رنج و غم کا اظہار کیا ہے۔