December 20, 2025

نئی دہلی: مرکزی وزیر برائے سڑک ٹرانسپورٹ و شاہراہیں نیتن گڈکری نے منگل کے روز سڑک حادثات میں زخمی افراد کی مدد کے لیے آگے آنے والوں کی حوصلہ افزائی کرتے ہوئے بڑا اعلان کیا ہے۔ انہوں نے کہا کہ جو بھی شہری حادثے کے بعد متاثرہ شخص کی مدد کرے گا، اسے ’’راہ ویر‘‘ کے طور پر شناخت دی جائے گی اور 25 ہزار روپے کا انعام دیا جائے گا۔

نتن گڈکری نے کہا کہ اکثر لوگ قانونی اور پولیس کارروائی کے خوف سے حادثات میں مدد کرنے سے گھبراتے ہیں، جس کی وجہ سے قیمتی جانیں ضائع ہو جاتی ہیں۔ انہوں نے عوام سے اپیل کی کہ وہ بغیر کسی خوف کے زخمیوں کو قریبی اسپتال پہنچائیں، کیونکہ پولیس انہیں کسی قسم کی پریشانی میں مبتلا نہیں کرے گی۔

مرکزی وزیر کے مطابق، تحقیقی مطالعات سے معلوم ہوا ہے کہ اگر حادثے کے فوراً بعد طبی امداد فراہم کی جائے تو ہر سال تقریباً 50 ہزار جانیں بچائی جا سکتی ہیں۔ اسی مقصد کے تحت حکومت نے فیصلہ کیا ہے کہ حادثے کے بعد جس بھی اسپتال میں زخمی کو داخل کیا جائے گا، وہاں سات دن کے علاج کا خرچ حکومت برداشت کرے گی، جس کی حد 1.5 لاکھ روپے تک ہوگی۔

نتن گڈکری نے سڑک تحفظ کے لیے اٹھائے گئے دیگر اقدامات کا بھی ذکر کیا۔ انہوں نے بتایا کہ ضلع کلکٹر کی قیادت میں کمیٹیاں قائم کی گئی ہیں جو ہر دو ماہ میں حادثات کے خطرناک مقامات (بلیک اسپاٹس) کی نشاندہی کرتی ہیں۔ اب تک تقریباً 60 ہزار بلیک اسپاٹس کی مرمت کی جا چکی ہے، جس پر 40 ہزار کروڑ روپے خرچ کیے گئے ہیں۔

انہوں نے مزید کہا کہ گاڑیوں میں چھ ایئر بیگز کو لازمی قرار دیا گیا ہے، جبکہ ہر دو پہیہ گاڑی کے ساتھ دو ہیلمٹ مفت دینا ضروری ہوگا۔ موبائل فون استعمال کرتے ہوئے ڈرائیونگ پر پابندی اور سڑک عبور کرتے وقت احتیاطی قوانین بھی نافذ کیے گئے ہیں۔

نتن گڈکری نے بتایا کہ بھارت میں ہر سال ایک لاکھ سے زائد افراد سڑک حادثات میں جان گنوا دیتے ہیں، جو نہایت تشویشناک ہے۔ انہوں نے زور دیا کہ زیادہ تر حادثات انسانی غلطیوں کے باعث ہوتے ہیں، اس لیے عوامی آگاہی مہمات کو مزید مؤثر بنایا جا رہا ہے