December 13, 2025

کولکتہ میں فٹبال لیجنڈ لیونل میسی کا متوقع شاندار استقبال بدنظمی اور ہنگامہ آرائی میں تبدیل ہو گیا۔ ’جی۔او۔اے۔ٹی ٹور آف انڈیا 2025‘ کے تحت منعقد ہونے والا یہ پروگرام سالٹ لیک اسٹیڈیم میں ہونا تھا، لیکن یہ تقریب صرف 20 منٹ میں ہی ختم ہو گئی۔

لیونل میسی ہفتہ کی صبح تقریباً 2:30 بجے کولکتہ پہنچے، جہاں ان کے استقبال کے لیے آدھی رات سے ہی شائقین کی بڑی تعداد سڑکوں پر موجود تھی۔ بعد ازاں میسی نے ہوٹل سے ہی 70 فٹ بلند اپنے مجسمے کی نقاب کشائی کی اور اداکار شاہ رخ خان کے ساتھ ملاقات اور تصاویر بھی کھنچوائیں۔

بعد میں جب میسی اپنے ساتھی کھلاڑیوں لوئس سواریز اور روڈریگو ڈی پال کے ساتھ ویویکانند یوبا بھارتی کریڑانگن (سالٹ لیک اسٹیڈیم) پہنچے تو اسٹیڈیم مکمل طور پر بھرا ہوا تھا۔ منصوبے کے مطابق میسی کو گراؤنڈ کا چکر لگانا تھا اور وزیر اعلیٰ ممتا بنرجی، سوراو گنگولی اور شاہ رخ خان سے ملاقات کرنی تھی۔

تاہم، میسی کے گرد سیاست دانوں اور خاص مہمانوں کے ہجوم کے باعث شائقین انہیں واضح طور پر دیکھ نہ سکے، جس سے غصہ بڑھ گیا۔ مایوس شائقین نے کرسیوں اور بوتلوں کی بارش شروع کر دی، جس کے نتیجے میں اسٹیڈیم میں توڑ پھوڑ ہوئی۔

صورتحال کو بگڑتا دیکھتے ہوئے سیکیورٹی نے فوراً میسی کو اسٹیڈیم سے باہر نکالا۔ این ڈی ٹی وی کے مطابق، لیونل میسی اسٹیڈیم میں محض 20 منٹ تک ہی موجود رہے۔

واقعے کے بعد مغربی بنگال کی وزیر اعلیٰ ممتا بنرجی نے عوامی طور پر معافی مانگی اور انتظامی ناکامی پر تحقیقات کا اعلان کیا۔ انہوں نے کہا کہ وہ اس بدانتظامی سے شدید دلبرداشتہ ہیں۔

واضح رہے کہ لیونل میسی اب حیدرآباد کا دورہ کریں گے، جہاں وہ تلنگانہ کے وزیر اعلیٰ ریونت ریڈی کے ساتھ ایک نمائشی میچ کھیلنے والے ہیں، تاہم کولکتہ مرحلہ شرمندگی میں بدل گیا۔