April 3, 2025

دہلی (شمع نیوز)
آخرکار متنازعہ وقف ترمیمی بل 2024 کو لوک سبھا میں منظور کرلیا گیا، جس پر ملک بھر میں شدید ردعمل دیکھنے میں آ رہا ہے۔ یہ بل 12 گھنٹوں کے طویل مباحثے کے بعد 288 ووٹوں کی حمایت اور 232 ووٹوں کی مخالفت کے ساتھ پاس کیا گیا۔ اپوزیشن کی جانب سے پیش کردہ تمام تر ترامیم کو صوتی ووٹنگ کے ذریعے مسترد کر دیا گیا، جس سے اپوزیشن کی کوششیں ناکام ہو گئیں۔

بل کی منظوری کے دوران حکومتی اور اپوزیشن جماعتوں کے درمیان تلخ کلا می اور لفظی نو ک جھو نک کا تبادلہ عمل میں آیا۔ اپوزیشن نے اس بل کو اقلیتی حقوق پر حملہ قرار دیا، جبکہ حکومت نے اسے اصلاحی اور عوامی فلاح کے لیے ضروری قانون قرار دیا۔ این ڈی اے کی حلیف جماعتوں، جنتا دل یو (جے ڈی یو) اور تلگو دیشم پارٹی (ٹی ڈی پی) نے حکومت کا ساتھ دیتے ہوئے بل کے حق میں ووٹ دیا، جس سے حکومت کو مزید تقویت ملی۔

اس بل کی منظوری کے بعد مسلمانوں میں شدید غم و غصہ پایا جا رہا ہے، اور کئی شہروں میں احتجاج کی اطلاعات موصول ہو رہی ہیں۔ مذہبی اور سماجی تنظیموں نے حکومت سے اس فیصلے پر نظرثانی کا مطالبہ کیا ہے، جبکہ اپوزیشن نے اس بل کے خلاف عدالت سے رجوع کرنے کا عندیہ دیا ہے۔

یہ بل اپنی نوعیت کے اعتبار سے ایک انتہائی حساس معاملہ بن چکا ہے، اور اس کی منظوری کے بعد ملک میں سیاسی اور سماجی حلقوں میں شدید بے چینی دیکھی جا رہی ہے۔