April 4, 2025

تمل ناڈو (شمع نیوز)
تمل سینما کے سپر اسٹار اور حالیہ سیاست میں قدم رکھنے والے اداکار وجے نے ایک بڑا سیاسی قدم اٹھاتے ہوئے متنازعہ وقف ترمیمی بل کے خلاف ملک گیر احتجاج کا اعلان کر دیا ہے۔ ان کی تیزی سے مقبول ہوتی سیاسی جماعت "تملگا ویترے کذجہم (TVK)" نے اعلان کیا ہے کہ وہ ریاست بھر میں بی جے پی حکومت کے خلاف سڑکوں پر اترے گی۔

وجے نے اپنے بیان میں کہاکہ "یہ بل صرف مسلمانوں ہی نہیں، بلکہ تمام انصاف پسند شہریوں کے خلاف ہے۔ یہ اقلیتوں کی مذہبی خودمختاری اور ان کے اداروں پر براہ راست حملہ ہے۔ ہم خاموش تماشائی نہیں بنیں گے۔" TVK کا ماننا ہے کہ وقف بورڈ کو کمزور کرنے کی کوشش، دراصل بی جے پی کے اس ایجنڈے کا حصہ ہے جو مسلسل اقلیتوں کے حقوق سلب کرنے کی طرف بڑھ رہا ہے۔ وجے کے اس بیان نے تمل ناڈو کی سیاست میں زبردست ہلچل مچا دی ہے، خاص طور پر اس وقت جب ریاست کی دیگر علاقائی جماعتیں اس حساس مسئلے پر محتاط خاموشی اختیار کیے ہوئے ہیں۔

سیاسی تجزیہ نگاروں کا کہنا ہے کہ وجے نے جو قدم اٹھایا ہے، وہ نہ صرف جراتمندانہ ہے بلکہ ایک واضح پیغام بھی دیتا ہے کہ وہ محض فلمی چمک دمک کے سہارے سیاست میں نہیں آئے، بلکہ اصولوں کی سیاست کا دعویٰ سچ ثابت کرنے کے لیے میدان میں اترے ہیں۔ان کے اس قدم کو نتیش کمار (جو اکثر مرکز کی پالیسیوں کے آگے جھک جاتے ہیں) اور چندرا بابو نائیڈو (جنہوں نے اکثر خاموش مفاہمت کو ترجیح دی) کے ساتھ موازنہ کرتے ہوئے سراہا جا رہا ہے۔ سوشل میڈیا پر لوگ کہہ رہے ہیں:"وجے میں وہ ریڑھ کی ہڈی ہے جو پرانے سیاستدانوں میں مفقود ہو چکی ہے۔"

ٹی وی کے کی جانب سے اعلان کردہ احتجاج اگلے ہفتے سے شروع ہونے والا ہے، جس کے تحت مختلف شہروں میں عوامی مظاہرے، ریلیاں اور دھرنے منعقد کیے جائیں گے۔ اس تحریک کو تمل ناڈو میں بی جے پی کے لیے ایک بڑا چیلنج قرار دے رہے ہیں، خاص طور پر ایسے وقت میں جب بی جے پی ریاست میں اپنا اثر بڑھانے کی کوشش کر رہی ہے۔