March 29, 2025

آندھرا پردیش چیف منسٹر چندرابابو نائیڈو نے وقف جائیدادوں کے تحفظ کے عزم کا اظہار کرتے ہوئے کہا کہ انکی حکومت مسلم خاندانوں کی فلاح و بہبود کے لیے کا فی سنجیدہ ہے۔

وجئے واڑہ میں حکومت کی جانب سے منعقدہ افطار پارٹی سے خطاب کرتے ہوئے انہوں نے رمضان کو ضبط نفس، خیرات اور غور و فکر کا مہینہ قرار دیا۔وزیر اعلی نائیڈو نے دعوی کیا کہ تلگو دیشم پارٹی نے ہمیشہ وقف جائیدادوں کی حفاظت کی ہے اور آئندہ بھی کرے گی۔

انہوں نے مزید بتایا کہ ان کی حکومت نے متنازعہ جی او 43 کو منسوخ کر کے وقف بورڈ کو بحال کیا، جو عدالتی تنازعات کے باعث غیر فعال ہو گیا تھا۔ چیف منسٹر آندھر ا پردیش نے مسلمانوں کے لیے اپنے دیرینہ اقدامات کا ذکر کرتے ہوئے بتایا کہ ٹی ڈی پی

حکومت نے حیدرآباد اور کرنول میں اردو یونیورسٹیاں قائم کیں، کڑپہ میں حج ہاؤس بنایا اور 2014 سے 2019 کے درمیان 32,722 غریب مسلم دلہنوں کو 163 کروڑ روپے کی مالی امداد فراہم کی۔ انہوں نے مزید کہا کہ ٹی ڈی پی نے متحدہ آندھرا پردیش میں بھی مسلمانوں کے لیے کئی اقدامات کیے، این ٹی آر نے فینانس کارپوریشن قائم کی، اردو کو دوسری سرکاری زبان کا درجہ دیا اور وقف جائیدادوں کا تحفظ یقینی بنایا۔

وزیر اعلیٰ نے یہ بھی اعلان کیا کہ ائمہ کی تنخواہیں 10,000 روپے اور مؤذنین کی 5,000 روپے کردی گئی ہیں، جبکہ اقلیتی بہبود کے بجٹ میں 1,300 کروڑ روپے کے اضافے کے ساتھ مجموعی طور پر 5,434 کروڑ روپے مختص کیے گئے ہیں۔