April 4, 2025

فلسطین (شمع نیوز)
اسرائیلی بمباری کے نتیجے میں ہزاروں فلسطینی بچے یتیم ہو چکے ہیں، جن میں سے کئی نے اپنے دونوں والدین کو کھو دیا ہے۔ یہ معصوم بچے سہارا، تحفظ اور تعلیم سے محروم ہو کر کھلے آسمان تلے بے یار و مددگار زندگی گزارنے پر مجبور ہیں۔ انسانی حقوق کی تنظیموں کے مطابق، غزہ میں جاری مسلسل حملے ایک انسانی المیے میں تبدیل ہو چکے ہیں، لیکن عالمی برادری کی خاموشی نے اسرائیلی جارحیت کو مزید بے خوف بنا دیا ہے۔

تازہ حملے میں ایک اسکول کو نشانہ بنایا گیا، جہاں تعلیم حاصل کرنے والے معصوم بچے اور بزرگ نشانہ بنے۔ اس بمباری میں کئی فلسطینی شہید، جبکہ درجنوں زخمی ہو گئے۔ زخمیوں میں کئی کی حالت تشویشناک ہے، جبکہ طبی سہولیات کی عدم دستیابی کے باعث مزید اموات کا خدشہ ظاہر کیا جا رہا ہے۔ غزہ میں خون کی ندیاں بہہ رہی ہیں، لیکن دنیا اب بھی خاموش تماشائی بنی ہوئی ہے۔

بحران کی شدت اور تباہ کن صورتحال

اسرائیلی حملوں کے نتیجے میں غزہ میں مکمل تباہی کی صورتحال ہے۔ اقوامِ متحدہ کی رپورٹس کے مطابق، 80 فیصد سے زائد آبادی شدید غذائی قلت کا شکار ہے، جبکہ ہزاروں لوگ بے گھر ہو چکے ہیں۔ اسپتال تباہ، ادویات ناپید، اور امدادی قافلوں پر بمباری کے باعث متاثرین کو کسی قسم کی مدد نہیں مل رہی۔

بچوں اور خواتین سمیت نہتے شہریوں پر بمباری کے نتیجے میں روزانہ درجنوں فلسطینی شہید اور زخمی ہو رہے ہیں، لیکن عالمی ادارے اور بڑی طاقتیں خاموشی اختیار کیے ہوئے ہیں۔ اسکول، اسپتال، اور رہائشی علاقوں پر حملے کر کے فلسطینیوں کو منظم طریقے سے نشانہ بنایا جا رہا ہے، جسے انسانی حقوق کے ماہرین نسل کشی قرار دے رہے ہیں۔

عالمی برادری کی مجرمانہ خاموشی

اس بحران کے باوجود، عالمی برادری کی مجرمانہ خاموشی اسرائیلی جارحیت کو مزید شہہ دے رہی ہے۔ اقوام متحدہ اور عالمی ادارے مذمتی بیانات تو جاری کر رہے ہیں، لیکن عملی طور پر فلسطینیوں کی مدد کے لیے کوئی اقدام نہیں اٹھایا جا رہا۔ مسلم دنیا سمیت تمام امن پسند اقوام سے مطالبہ کیا جا رہا ہے کہ وہ آگے بڑھ کر فلسطینیوں کی حمایت کریں اور اسرائیل کے مظالم کو روکنے کے لیے عملی قدم اٹھائیں۔ غزہ میں جاری یہ بربریت کب ختم ہوگی؟ کیا دنیا صرف دیکھتی رہے گی؟ فلسطینی عوام ایک بار پھر انصاف اور مدد کے منتظر ہیں، لیکن کیا کوئی ان کی پکار سنے گا؟