April 1, 2025

تلنگا نہ (شمع نیوز)وفاقی وقف ترمیمی بل کے خلاف ملک بھر میں احتجاج کی لہر تیز ہوتی دیکھا ئی دے رہی ہے، جس میں دہلی کے جنتر منتر،پٹنہ اور وجے واڑہ میں آل انڈیا مسلم پرسنل لا بورڈ (AIMPB) کی اپیل پر مظاہروں کا اہتما م کیا گیا۔

اس تحریک کے ساتھ یکجہتی کے طور پر، طلبہ اسلامی تنظیم (SIO) تلنگانہ نے ریاست کے مختلف شہروں اور اضلاع جیسے حیدرآباد، وارنگل، نظام آباد، کریم نگر اور دیگر مقامات پر عیدگاہوں اور مساجد میں پرامن احتجاج کا اہتما م کیا گیا اور وقف املاک کے حقوق و خودمختاری کی حفاظت کا مطا لبہ کیا ہے۔

ایس آئی او تلنگانہ کے ریاستی صدر، محمد فراز احمد نے کہاکہ "مرکزی حکومت وقف املاک کو اپنے ہندوتوا ایجنڈے اور ووٹ بینک کی سیاست کے لیے چھیننے کی کوشش کر رہی ہے۔ یہ سراسر ناانصافی ہے جو اس طرح کے قانون سے مسلمانوں کے جذبات کو کافی ٹھیس پہنچتی ہے۔ ہم پختہ یقین رکھتے ہیں کہ وقف املاک اللہ کی ہیں، اور مسلمان صرف ان کے نگہبان ہیں —اس میں کسی قسم کی مداخلت قابل قبول نہیں۔"

ایس آئی او نے مزید کہا کہ ”ہم اس بل کے خلاف تین محاذوں پر فوری کارروائی کی اپیل کرتے ہیں:پہلا، اس کے نقصانات اور نتائج کے بارے میں آگاہی حاصل کریں۔دوسرا، مسلم کمیونٹی اور غیر مسلم اتحادیوں میں اس کا شعور پیدا کریں، اور یہ باور کرائیں کہ یہ جمہوری اقدار کے لیے خطرہ ہے، نہ کہ ایک ہندو مسلم مسئلہ۔تیسرا، پرامن احتجاجوں اور دھرنوں کے ذریعے اس بل کی مزاحمت کریں، مسلم پرسنل لا بورڈ کی حمایت کے ساتھ“ (شمع نیوز)